28/06/2025

Ym mis Gorffennaf mi fydd tîm pêl-droed merched Cymru yn chwarae yn Ewro 2025 - y tro cyntaf erioed iddyn nhw chwarae yn un o’r prif gystadlaethau rhyngwladol. Mae’r rhaglen hon yn olrhain hanes y tîm, ac yn siarad efo’r rhai sydd wedi bod yn rhan o’r daith dros y blynyddoedd diwethaf gan gynnwys Yr Athro Laura McAllsiter, Kath Morgan, Gwennan Harries a’r capten presennol Angharad James.

Doedd Cymdeithas Bêl-droed Cymru ddim yn fodlon cydnabod y tîm pan gafodd ei ffurfio yn 1973. Am 20 mlynedd bu’n rhaid i’r chwaraewyr drefnu a thalu am bopeth eu hunain, cyn i’r Gymdeithas o’r diwedd gymryd rheolaeth o’r tîm yn 1993.

O fynd o fod yn dîm answyddogol i chwarae gyda goreuon Ewrop yn Ewro 2025 - mae hi’n dipyn o stori.