Ac mi gefais innau fodd i fyw o syrthio i demtasiwn – a chyfaddef wrth gwrs fod gen i ddiddordeb personol mewn unrhyw beth o’r Wladfa ym Mhatagonia.

Ta beth cyfrol ydi hon, wedi ei golygu gan Esyllt Nest Roberts de Lewis, o gerddi i blant Patagonia ac wedi ei cyhoeddi gan Orsedd y Wladfa.

Mae yna gerddi gan rai o Batagonia  fel Osian Hughes, Mary green, Irma Hughes de Jones, Arel Hughes de Sarda ac athrawon o Gymru a beirdd  amlwg o Gymru  ei hun gan gynnwys Iwan Llwyd , Mererid Hopwood, Gwion Hallam, Gwyneth Glyn a Grahame Davies.

Mae nodyn bywgraffyddol byr am y cyfranwyr i gyd - 23 ohnyn nhw – ar ddiwedd y gyfrol.

“Mae’r cyfan ohonynt bron wedi eu cyfansoddi’n arbennig ar gyfer y gyfrol hon,” meddai Esyllt Nest Roberts de Lewis am y cerddi.

Daw hi gyda llaw o Bencaenewydd, Pen Llŷn, ond yn byw gyda’i theulu yn y Gaiman er 2004. Hi yw golygydd Y Drafod ac enillodd Gadair Eisteddfod y Wladfa 2010.

 Clare Whitehouse sydd biau’r gerdd yn nheitl y gyfrol am Juan y Gwanaco, hi yn dod o Abermorddu ger Wrecsam ac yn athrawes Gymraeg yn Esquel a Threvelin fel rhan o’r cynllun iaith.

Cyfrol fach delynegaidd, hyfryd, Gwladfaol ei naws a'i blas ac ar gael mewn siopau llyfrau Cymraeg yng Nghymru.