Apel y Talwrn

Apêl ar Ran Y Talwrn

Y mae’r Talwrn yn ddigartre,

y mae’r beirdd ar daith y glêr

ac mae’r Meuryn fel rhyw hobo’n

gorfod cysgu dan y sêr.

Felly, plîs, wrandawyr annwyl,

rhowch wahoddiad nawr i ni

i ricordio ein rhaglenni

yn eich cymunedau chi.

Leoliadau ledled Cymru

rhowch wahoddiad nawr i ni,

wa’th dyw’r talwrn ddim yn dalwrn

oni bai amdanoch chi.

Boed yn festri, boed yn fistro,

boed e’n batio neu glwb bowls,

bwyty, gwesty neu hen gastell,

neu lyfyrgell, neu sied ffowls,

rhowch wahoddiad i’r hen dalwrn,

nid yw’n costio dim i chi,

dim ond cynnull cynulleidfa,

eistedd nôl a joio’r sbri!

Leoliadau ledled Cymru

rhowch wahoddiad nawr i ni,

wa’th dyw’r talwrn ddim yn dalwrn

oni bai amdanoch chi.

Bydd y beirdd yn gwerthfawrogi

bach o fwyd a dishgled ffein:

nid llawenydd yw llawenydd

heb y lluniaeth, medde’r rhein.

Gwinoedd drud a chig y ceirw

oedd y wledd flynyddoedd nol,

ond bodlonith beirdd y talwrn

ar cream horn a sausage roll!

Leoliadau ledled Cymru

rhowch wahoddiad nawr i ni,

wa’th dyw’r talwrn ddim yn dalwrn

oni bai amdanoch chi.

Cyn terfynu rhaid apelio

i gael tîmau newydd sbon,

boed y rheini mewn cewynne

neu yn pwyso ar eu ffon.

Oes, mae angen cystadleuaeth

ar y timau gorau i gyd

er mwyn profi taw beirdd Cymru

yw talyrnwyr gorau’r byd.

Beirdd a lleoliadau Cymru,

rhowch eich enwau nawr i ni,

wa’th dyw’r talwrn ddim yn dalwrn

oni bai amdanoch chi.

cwj (1.10.14)